Toive –muuzikkujoukko

Toive on sildu mennytaijan da nygyaijan välil. Se elvyttäy vahnua perindyö. Toive ruadau jo 20 vuottu. Sen johtajannu on Genrih Turovskij. Kahtenkymmenen vuvven aigah Toive –muuzikkujoukos on vaihtunuh mondu polvie. Nygöi sie on 65 hengie, kuduat opastutah itämerensuomelazien kielien da kul'tuuran tiedokunnal.

Toive – muuzikkujoukkuo kiinnostau kanzallinen muuzikku da itämerensuomelazien kanzoin kul′tuuru. Vuvvennu 1999 joukko rubei tutkimah Skandinaavin mualoin kul′tuurua. Syyny oli se, gu Petroskoin valdivonyliopistos ruvettih hyvin tutkimah skandinuavistu kieldy.

Jo vuvven peräs toivelazet käydih Ruoččih. Joukko sai äijän ruoččilastu ainehtu da nevvuo ruoččilazien kanzanperindölöin sellittämizes.

Toive – pajojoukon jälgimäine uudistus on jevreiläine ohjelmu, kudamas on esitetty jevreiläine muuzikku. Se avvuttau ellendiä jevreiläzien omaničentunduo.

Joukko on hyvin tundiettu Karjalas, Ven′al da ulgomual. Se ottau ozua kanzanpruazniekois Kižin suarel. Pajojoukko oli Irakas da Yhtysvallois, Suomes da Daanies.

Toive otti ozua kanzanvälizes festivualis, kuduadu piettih Rääkkyläs. Daanies nelläs päiväs muuzikkujoukko esitti nelli suurdu kontsertua da sil oli suuri menestys. Muuzikkujoukon esitystazo tovestettih korgiekse da monipuolizekse. Toive sai lahjakse äijy ainehtu, kuduat koskietah daanielazii tansuloi da muuzikkua.

Turovskij on hyviä mieldy, gu pohjasmualoin matkois nuoret suadih äijy mielikuvua.

Nadežda Bukina da Tatjana Manuilova